نئی دہلی،3/مارچ (ایس او نیوز/ایجنسی) عام آدمی پارٹی (عآپ) کے راجیہ سبھا کے رکن پارلیمنٹ سنجے سنگھ آج کو سنسنی خیز انکشاف کرنے جا رہے ہیں۔ انہوں نے ٹوئٹ کر کے یہ اطلاع دی ہے۔ سنجے سنگھ کا یہ انکشاف منیش سسودیا کی گرفتاری کے حوالہ سے ہو سکتا ہے۔ ساتھ ہی انہوں نے وزیر اعلیٰ نریندر مودی کی ایک پرانی تقریر کے ایک نعرے ’یہ دیش نہیں بکنے دوں گا‘ کا استعمال کیا ہے، جس سے تصور کیا جا رہا ہے کہ ان کا انکشاف مرکزی حکومت سے متعلق بھی ہو سکتا ہے۔

عآپ کے رکن پارلیمنٹ سنجے سنگھ نے ٹوئٹ کیا “گیم اب ڈائریکٹ (راہ راست) ہے۔ کسی کے ساتھ کبھی بھی کچھ بھی ہو سکتا ہے۔ جو لڑے گا وہ جیتے گا یا ہارے گا۔ جو نہیں لڑے گا وہ بزدل کہلائے گا۔ آج ایک بہت بڑا انکشاف کروں گا۔ ‘یہ دیش نہیں بکنے دوں گا‘۔‘‘ اپنے دوسری ٹوئٹ میں سنجے سنگھ نے لکھا کہ وہ سہ پہر تین بجے پارٹی دفتر میں پریس کانفرنس کرنے جا رہے ہیں۔

خیال رہے کہ شراب پالیسی معاملے میں دہلی کے نائب وزیر اعلی منیش سسودیا کو اتوار کی شام سی بی آئی نے گرفتار کر لیا تھا۔ انہیں سی بی آئی نے 8 گھنٹے طویل پوچھ گچھ کے بعد گرفتار کیا۔ اس کے بعد عدالت نے 4 مارچ تک منیش سسودیا کا جسمانی ریمانڈ سی بی آئی کو دے دیا۔ دہلی شراب پالیسی معاملے میں جانچ ایجنسی نے سسودیا کی 5 دن کے ریمانڈ کی درخواست کی تھی جسے عدالت نے قبول کر لیا۔ ایسے میں یہ قیاس کیا جا رہا ہے کہ یہ سنسنی خیز انکشاف دہلی کے سابق نائب وزیر اعلیٰ منیش سسودیا کی گرفتاری کے سلسلے میں ہو سکتا ہے۔